Bashkimi Evropian kërkoi nga Kosova dhe Serbia që sa më parë të rinisë procesi i dialogut në mënyrë që palët të mund të trajtojnë çështje të rëndësishme për normalizimin e raporteve. Zëdhënësi i BE-së, Peter Stano, tha se nëse nuk ka përparim në dialog, nuk ka përparim as në rrugën evropiane për Kosovën dhe Serbinë. Nga Qeveria u kërkua themelimi i Asociacionit të komunave më shumicë serbe.
‘’Sikurse çdo gjë në dialog, afatet kohore nuk janë në dorë tonë. Afatet kohore varen nga aftësia e palëve për të përmbushur kërkesat e nevojshme, kriteret apo zotimet. Palët duhet të fillojnë të punojnë si duhet në normalizim, të ecin para në agjendën evropiane, pasi nëse nuk ka progres në dialog, s’ka progres edhe në rrugën evropiane. E ka cekur BE-ja këtë në disa raste. Është esenciale zbatimi i marrëveshjes ku bënë pjesë edhe Asociacioni i komunave me shumicë serbe’’, tha Stano.
Në Qeveri thanë se mbesin të përkushtuar në proces të dialogut dhe zbatimin e marrëveshjes së arritur në Bruksel dhe Ohër. Zëdhënësi i Qeverisë, Përparim Kryeziu, tha se sekuencimi dhe zbatimi i marrëveshjes bazike dhe aneksit duhet të bëhet në mënyrë të drejtë, të barabartë për palët e përfshira në proces.
Në opozitë thonë se zvarritje të qëllimshme të Qeverisë për themelimin e Asociacionit. Duke kritikuar kryeministrin Kurti se po krijon kriza në veri për t’iu shmangur themelimit të Asociacionit, deputeti i PDK-së Hisen Berisha tha se Asociacioni që ka pranuar Kurti do t’i sjellë autonomi komunave me shumicë serbe.
‘’Nxjerrja e Asociacionit si temë e Brukselit do të rrezikojë që në Kosovë të ketë autonomi territoriale. Rezistenca e Kurtit për të zbatuar obligimet që ka marrë në Bruksel dhe në Ohër është rezultat i të kuptuarit se ka bërë marrëveshje të dëmshme për Kosovën”, deklaroi Berisha.
Analisti politik, Albinot Maloku, tha se Qeveria nuk po e konkretizon hartimin e statutit të Asociacionit prandaj faktori ndërkombëtar po kërkon hapa të shpejtë. Sipas tij, çdo zvarritje për themelimin e Asociacionit do të ketë pasoja në raportet me faktorin ndërkombëtar.
‘’Qeveria të jetë e gatshme me propozim për statutin e Asociacionit. Faktori ndërkombëtar po kërkon themelimin e kësaj trupe, cdo zvarritje do të jetë pengesë me përafrimin e Kosovës me instancat ndihmuese që i bjen me SHBA-të”, tha Maloku.
Ambasadori i SHBA-së, Jeff Hovenier, tha se kërkojnë nga Kosova lëvizë shpejt, vendosmërisht, për të çuar përpara negociatat për të krijuar një Asociacion të Komunave me Shumicë Serbe./21Media
