Begaj në OKB takon presidentin e Ganës, konfirmohet njohja e Kosovës

Presidenti i Shqipërisë, Bajram Begaj gjatë Asamblesë së Përgjithshme të Kombeve të Bashkuara në Nju Jork është takuar me presidentin e Ganës, John Dramani Mahama.

Në një postim në platformën “X”, Begaj bëri të ditur se biseduan për forcimin e bashkëpunimit dypalësh dhe shumëpalësh, si dhe për konfirmimin e njohjes së Kosovës nga ana e Ganës.

“Sot në OKB, u takova me presidentin e Ganës, JDMahama, për të diskutuar avancimin e bashkëpunimit tonë dypalësh dhe shumëpalësh, si dhe për të konfirmuar njohjen e Kosovës nga ana e Ganës. Shqipëria mbetet e përkushtuar ndaj forcimit të pozicionit ndërkombëtar të Kosovës,” shkroi Begaj.