Bllokimi i sistemit të pranimit të komenteve, ZRRE del me sqarim për qytetarët
Zyra e Rregullatorit për Energji (ZRRE) ka reaguar pas raporteve nga qytetarët rreth vështirësive në lënien e komenteve dhe bllokime të sistemit të pranimit të komenteve gjatë periudhës së fundit.
Në një sqarim për media, ZRRE njofton se të gjitha komentet e dërguara nga qytetarët janë marrë në shqyrtim dhe nuk ka pasur asnjë bllokim të pranimit në e-mail adresën e dedikuar për komente.
ZRRE siguron qytetarët se çdo komunikim është trajtuar me seriozitet dhe se të gjitha ankesat dhe komentet janë regjistruar në sistemin e institucionit pa asnjë ndërprerje.
Pas verifikimeve të kryera, ZRRE thotë se rezulton se nuk ka pasur asnjë problem teknik në sistemin e pranimit të komenteve mbi sektorin e energjisë në Kosovë, raporton KosovaPress.
“Ne sigurojmë që të gjithë qytetarët dhe palët tjera që kanë dërguar komente do të kenë mundësi të marrin përgjigje rreth tyre. ZRRE-ja është e angazhuar për një komunikim të hapur dhe transparent me qytetarët dhe do të vazhdojë të ofrojë mundësinë për dërgimin e komenteve dhe ankesave”, thuhet në njoftim.
