Futbollisti Cristiano Ronaldo është fejuar me partneren e tij, Georgina Rodriguez.
Ajo e bëri të ditur lajmin në rrjetet sociale, duke publikuar një foto me një unazë të madhe dhe duke shkruar në spanjisht: “Po, unë pranoj. Në këtë dhe në të gjitha jetët e mia”.
Nuk janë dhënë detaje të tjera. Ronaldo, i cili është personi më i ndjekur në Instagram, nuk ka komentuar ende për fejesën, sipas BBC.
Çifti janë bashkë prej nëntë vitesh, pasi u takuan në një dyqan të Gucci-t në Madrid ku Rodriguez punonte. Në atë kohë ai luante për klubin spanjoll Real Madrid.
Lojtari i Al-Nassr ka gjithsej pesë fëmijë, dy prej të cilëve i ka me Rodriguez. Vajza e tyre më e vogël, Bella, lindi në prill 2022, së bashku me një djalë që lindi i pajetë. Rodriguez ka ndihmuar gjithashtu në rritjen e tre fëmijëve të tjerë të Ronaldos.
31-vjeçarja, e cila ka luajtur në serialin e saj në Netflix I Am Georgina, më parë ka folur për spekulimet rreth statusit të saj të fejesës. Në program, ajo tha se miqtë e saj “gjithmonë bëjnë shaka për dasmën”.
“Që kur doli kënga e Jennifer Lopez ‘The Ring Or When’, ata nisën ta këndonin për mua. Epo, kjo nuk varet nga unë”, shtoi ajo.
Figura të njohura si Kim Kardashian kanë pëlqyer njoftimin për fejesë në rrjetet sociale. Piers Morgan, i cili e intervistoi Ronaldon në vitin 2022, uroi që ata të kenë “po aq sukses në martesë sa ka pasur ai në fushën e futbollit!”
Make-up artistja e famshme Charlotte Tilbury e quajti “lajm të mrekullueshëm”. Lauren Sanchez-Bezos, e cila u martua me themeluesin e Amazon Jeff Bezos në qershor, tha se ishte “shumë e lumtur” për çiftin.
Familja aktualisht jeton në kryeqytetin e Arabisë Saudite, Riad, ku Ronaldo luan për Al-Nassr. Ai iu bashkua klubit në dhjetor 2022 për një pagë vjetore të raportuar prej 238 milionë dollar.
Në qershor 2025, u njoftua se kontrata e 40-vjeçarit u zgjat deri në vitin 2027, pas spekulimeve se ai po përgatitej të tërhiqej.
Në një postim në X, Ronaldo shkroi: “Një kapitull i ri fillon. I njëjti pasion, e njëjta ëndërr. Le të bëjmë histori bashkë”.
