​Finlandezët drejt qendrave të votimit për të zgjedhur presidentin e ri

Votuesit finlandezë të dielën iu drejtuan kutive të votimit për të zgjedhur pasardhësin e presidentit Sauli Niinisto, mandati i dytë gjashtëvjeçar i të cilit do të përfundojë.

Votimi në vend filloi në orën 9 të mëngjesit dhe do të përfundojë në orën 21:00.

Rreth 4.5 milionë votues do të votojnë për nëntë kandidatë, megjithatë, sondazhet tregojnë se ish-kryeministri Alexander Stubb dhe ish-ministri i Jashtëm Pekka Haavisto janë kryesuesit.

Nëse asnjë kandidat nuk merr më shumë se 50% të votave të kërkuara në raundin e parë, një raund i dytë i zgjedhjeve do të zhvillohet më 11 shkurt.

Rezultatet e para jozyrtare priten në mesnatë. Finlanda braktisi politikën e saj të gjatë të neutralitetit ushtarak nën presidencën e Niinisto, pas luftës Rusi-Ukrainë dhe u bë anëtare e NATO-s në prill.