FSK: Përfundon Java Ndërkombëtare e Kadetëve, sukses i standardeve ndërkombëtare
Forca e Sigurisë së Kosovës ka thënë se është përfunduar Java Ndërkombëtare e Kadetëve.
Në një postim në Faceobok, FSK bën të ditur se kjo u mbajt në Qendrën për Studime Universitare, dhe është një tjetër sukses i arritur drejt promovimit si një institucion akademik ushtarak me standarde ndërkombëtare.
“Në Qendrën për Studime Universitare u mbajt Java Ndërkombëtare e Kadetëve, një ngjarje e veçantë që bashkoi kadetë nga akademi të ndryshme ushtarake si Akademia “West Point” dhe Norwich University nga SHBA, Royal Military College Saint-Jean nga Kanada, Akademia e Forcave të Armatosur nga Shqipëria dhe Akademia Ushtarake nga Maqedonia e Veriut për një javë plotë aktivitete. Përmes ligjëratave, ushtrimeve praktike dhe aktiviteteve të përbashkëta, pjesëmarrësit patën mundësinë të njohin nga afër sistemin arsimor ushtarak të QSU-së dhe të ndajnë përvojat e tyre me kolegë ndërkombëtarë”, thuhet në njoftim.
