Parlamenti grek ka miratuar pas shumë debateve, projektligjin që lejon deri në 13 orë punë në ditë.
Qeveria konservatore e ‘Demokracisë së Re’’ e quan atë një reformë që promovon “punë të drejtë dhe fleksibël për të gjithë”, ndërsa sindikatat greke e konsiderojnë legjitimim të “skllavërisë së paguar”.
Ligji i ri, i nënshkruar nga ministri i Punës Niki Kerameos, përcakton që punonjësit e sektorit privat mund të punësohen nga i njëjti punëdhënës për 13 orë në ditë (përveç orarit të zakonshëm 8-orësh) për jo më shumë se 37 ditë në vit, në bazë vullnetare, shkruan tgcom24.
Orët shtesë do të kompensohen me një rritje page prej 40%. Një ligj aktual (i miratuar gjithashtu nga konservatorët dy vjet më parë) tashmë lejon ditë pune 13-orëshe, por vetëm për dy punëdhënës të ndryshëm.
Pavarësisht protestave nga përfaqësuesit e punëtorëve, partia në pushtet, me shumicën e saj në parkament, ka vendosur të vazhdojë përpara.
