Guvernatori i Bankës Qendrore të Kosovës Fehmi Mehmeti, sot priti në takim përfaqësuesit e Rrjetit të Bizneseve të Diasporës Shqiptare me seli në SHBA
Rrjeti i bizneseve ishin të kryesuar nga presidenti Nazar Mehmeti, sekretari i Përgjithshëm Ismet Smajli dhe drejtori Naim Dedushaj.
Në takim u diskutua mundësia e investimit në sektorin bankar të Republikës së Kosovës, ku përfaqësuesit e Rrjetit të Bizneseve të Diasporës nga SHBA shprehën gatishmërinë për fillimin e procedurave për hapjen e bankës së diasporës në Kosovë.
Guvernatori Mehmeti mirëpriti një iniciativë të tillë dhe informoi përfaqësuesit e Rrjetit të Bizneseve të Diasporës Shqiptare lidhur me kërkesat ligjore të BQK-së për licencimin e një banke.
Ai po ashtu falënderoi delegacionin e Rrjetit të Bizneseve të Diasporës Shqiptare në SHBA për interesimin e tyre në sistemin financiar në Kosovë dhe i informoi lidhur me zhvillimet e fundit në sektorin financiar në Kosovë dhe lidhur me treguesit e shëndetit financiar.
Guvernatori Mehmeti theksoi kontributin e madh që diaspora shqiptare ka dhënë në të kaluarën dhe po vazhdon ta jap për zhvillimin ekonomik të Kosovës, përfshirë këtu nevojën e madhe që të hyrat nga diaspora të transformohen nga konsumi në investime që do të kontribuonin direkt në zhvillim ekonomik të Kosovës, thuhet në komunikatë.
