Itali: Përmbyset vetura, dy shqiptarë të vdekur dhe një i lënduar rëndë
Dy shqiptarë kanë mbetur të vdekur dhe një tjetër ka mbetur i plagosur rëndë si pasojë e një aksidenti me makinë mbrëmë pas orës 22:00 në Via Casilina, në zonën mes Colleferro dhe Anagni, në Itali.
Mediumi italian RomaToday shkruan se makina tip BMW e cila drejtohej nga një shqiptar, ka humbur kontrollin dhe ka dalë jashtë rrugë duke u përmbysur. Si pasojë e përplasjes, mjeti ka shpërthyer në flakë. I plagosuri, gjatë rrokullisjes së mjetit, ka dalë jashtë tij, duke i shpëtuar djegies.
Po ashtu raportohet se kjo makinë ishte e vjedhur, por nuk dihen më shumë detaje. Në vendngjarje kanë ndërhyrë edhe zjarrfikësit dhe ambulancat të cilat nuk kanë mundur të bëjnë gjë tjetër veçse konfirmojnë vdekjen e të dyve. I plagosuri u transportua me urgjencë në spital, ndërsa trupat u dërguan në morgun e Poliklinikës Tor Vergata ku u identifikuan nga gjurmëve të gishtërinjve. Sipas asaj që bëri me dije policia, në makinë u gjetën mjete për vjedhje.
