Jashari takohet me ambasadorin britanik, diskutojnë për thellimin e bashkëpunimit ushtarak
Komandanti i Forcës së Sigurisë së Kosovës, gjenerallejtënant Bashkim Jashari, ka pritur në takim ambasadorin e Mbretërisë së Bashkuar në Kosovë, Jonathan Hargreaves.
Gjatë takimit, siç u tha, Jashari falënderoi ambasadorin për mbështetjen strategjike dhe përkushtimin e Mbretërisë së Bashkuar në zhvillimin e FSK-së, duke vlerësuar bashkëpunimin e deritanishëm mes dy vendeve.
Gjatë këtij takimi u diskutua po ashtu edhe për zhvillimin e deritanishëm të FSK-së, planifikimet për të ardhmen si dhe për synimet e avancimit të marrëdhënieve bilaterale ushtarake ndërmjet Mbretërisë së Bashkuar dhe Kosovës.
“Në fund të takimit ambasadori Hargreaves falënderoi Gjeneral Jasharin për profesionalizmin e treguar në udhëheqjen e FSK-së. Kurse Gjeneral Jashari falënderoi ambasadorin Hargreaves për mbështetjen e vazhdueshme që Mbretëria e Bashkuar ka dhënë në zhvillimin dhe avancimin e FSK-së gjatë të gjitha fazave të ngritjes së saj”, thuhet në postimin e FSK-së.
