Krasniqi: BE t’i tregojë Kosovës pse ka ndryshuar qëndrim për Urën e Ibrit

Ministri i Administrimit të Pushtetit Lokal, Elbert Krasniqi në një konferencë pas mbledhjes së Qeverisë ka thënë se Bashkimi Evropian duhet t’i tregoj Kosovës se përse ka ndryshuar qëndrim sa i përket hapjes së urës së Ibrit.

Tutje Krasniqi u shpreh se do të vazhdojnë koordinimin me partnerët ndërkombëtarë, ndonëse nuk dha një datë se kur mund të hapet ura.

“Nga viti 2018-2021 në raportet e BE-së thuhet se ura është gati dhe ajo duhet të hapet. BE duhet të na tregoj së çfarë ka ndryshuar që nga ai vit. Dialogu ynë me qytetarët serbë për hapjen e urës nuk ka qenë vetëm këto ditë, ne vazhdimisht kemi qenë në kontakt me ta. Nuk ka asnjë arsye se pse ura duhet të jetë e mbyllur. Aty janë edhe dy ura tjera që shfrytëzohen. Unë vazhdimisht i shoh qytetarët serbë dhe sigurisht që hapja e urës do të lehtësojë jetën e qytetarëve. Ura është momentalisht në gëlqerosje dhe përgatitje tjera. Ne jemi duke i përmbyllur të gjitha punët dhe sigurisht se nuk mund të them një datë se kur do të hapet ura. Ne për këtë do të vazhdojmë koordinimin”, tha ndër tjera Krasniqi.