Kurti për ndërtimin e dy klinikave: Qytetarët s’do të shkojnë më për shërim jashtë shtetit

Kryeministri i Kosovës, Albin Kurti, ka thënë se me ndërtimin e Klinikës së Nefrologjisë dhe asaj të Hemato-Onkologjisë do t’u mundësohet qytetarëve të mos mendojnë më për të udhëtuar jashtë shtetit për shërim.

Gjatë adresimit për media, Kurti ka thënë se fillimisht u mendua se ky projekt do të zgjaste 36 muaj, por se nga kompania kanë thënë se ndërtimi i klinikave mund të kryhet për 24 muaj.

“Qytetarët kosovarë nuk do të kenë më nevojë që të mendojnë me cilën aviokompani do të udhëtojnë jashtë shtetit për t’u shëruar siç ka ndodhur në këto dy dekada, por do të marrin shërbime cilësore shëndetësore në Kosovë. Pacientët do të kenë qasje në shërbime të reja që nuk janë të disponueshme në vendin tonë. Ky është kapërcimi më i rëndësishëm që po bëhet në investimet në shëndetësi”, ka thënë Kurti.

Klinika e Nefrologjisë shërben për pacientët me sëmundje të veshkave, ndërsa ajo e Hemato-Onkologjisë për ata me kancerë.