Në mesin e dhjetorit të vitit të kaluar, Ezequiel Lavezzi u shtrua në spital në rrethana ende të paqarta, pasi pati alivanosje. Në versionin fillestar u raportua se ish-lojtari i Napolit dhe PSG-së ishte goditur me thikë gjatë një debati.
Thashethemet u mohuan menjëherë nga të afërmit. Është hedhur gjithashtu hipoteza se alivanosja e tij ka ndodhur gjatë një feste në Punta del Este, një vendpushim bregdetar në juglindje të Uruguait.
Sipas “L’Equipe”, Lavezzi është ende i shtruar në këtë klinikë, në “izolim pothuajse total” për të trajtuar veçanërisht problemet e tij me alkoolin.
“Është e vështirë. Por duhet ta bëj, duhet të riorientoj jetën time, zakonet e mia. Dhe të gjitha këto duhet t’i bëj për djalin tim. E kisha kaluar kufirin. U përpoqa të ndalesha por nuk munda. Nuk kishte zgjidhje tjetër veçse të vija këtu”, mësohet se i ka thënë Lavezzi një të afërmi.
