Presidenti rus, Vladimir Putin sot urdhëroi komandantët e tij të anulonin një plan të dukshëm për të sulmuar fabrikën e çelikut Azovstal në Mariupol – bastioni i fundit i mbrojtjes së Ukrainës në qytetin port të rrethuar.
Në vend të kësaj, ai urdhëroi trupat të mbyllnin zonën aq fort sa që edhe “një mizë nuk mund të kalojë”.
Në një telefonatë, Maksym Zhorin, një zyrtar i lartë i batalionit Azov me bazë në Kiev, tha se komentet e liderit rus dëshmuan se trupat e tij po përpiqeshin të bënin përparim kundër forcës shumë më të vogël që mbronte fabrikën industriale, transmeton rtv21.tv
“Rusët sapo kanë pranuar humbjen e tyre të mundshme,” tha ai. Presidenti Putin ndryshoi qëndrim, shtoi ai, sepse “ata nuk janë në gjendje të pushtojnë Azovstal”.
Ndonëse forcat pushtuese kontrollojnë pothuajse të gjithë qytetin port jugor, ata nuk kanë mundur të largojnë ukrainasit nga fabrika e çelikut. Luftëtarët atje përbëhen nga trupat e Azov – një grup i diskutueshëm me lidhje me të djathtën ekstreme – dhe marinsat.
Zhorin pretendoi se rusët kishin bombarduar strehimoret ajrore të civilëve në qytet dhe se ata kishin përdorur bomba thërrmuese dhe municione me fosfor të bardhë në një përpjekje për të pastruar ukrainasit.
BBC nuk i ka verifikuar në mënyrë të pavarur këto pretendime , por ka gjetur se municione thërrmuese janë përdorur diku tjetër në konflikt.
Dhe Zhorin e shpalli betejën për Mariupolin si “një provë për botën”.
“Nëse njerëzimi mund të reagojë, mund të bashkohet, për të shpëtuar civilët e pafajshëm,” tha ai./21Media
