Musliu: Ju shkoj jeta duke u mshef qyqeve, her ner qebe e her ner kapuqa

(Lajm i përditësuar)

Musliu: Ju shkoj jeta duke u mshef qyqeve, her ner qebe e her ner kapuqa

Deputetja e Kuvendit të Kosovës nga radhët e PDK-së  Ganimete Musliu ka reaguar pas publikimit të disa mesazheve mes koordinatores së komiteteve në Vetëvendosje, Dejona Mihalit, dhe ish-kryeshefit të KEK-ut, Nagip Krasniqi, rreth përfshirjes së Martin Berishajt në dallavere me rrymë.

Musliu përmes një postimi në Facebook, ka shkruar se ”Ju shkoj jeta duke u mshef qyqeve, her ner qebe e her ner kapuqa. Te ligj, manipulanta, hajna, t’pa aftë, zhylla!”.

LDK reagon pas publikimit të mesazheve mes Mihalit e Krasniqit: LVV ka dështuar për “Qeveri me duar të pastra”

Pas publikimit të disa mesazheve mes koordinatores së komiteteve në Vetëvendosje, Dejona Mihalit, dhe ish-kryeshefit të KEK-ut, Nagip Krasniqi, rreth përfshirjes së Martin Berishajt në dallavere me rrymë, ka reaguar LDK-ja. Anëtari i Kryesisë së Lidhjes Demokratike të Kosovës, Visar Azemi, në një konferencë për media, deklaroi se kjo Qeveri pas braktisjes së ushtarëve të FSK-së, ka braktisur vlerat dhe besimin e qytetarëve, ku kishin premtuar se do të luftojnë korrupsionin dhe do të bëjnë “qeveri më duar të pastra”.

Sipas tij, Qeveria aktuale nuk e ka ndërmend të luftojë korrupsionin, e duart e tyre i kanë “gjithçka përveçse të pastra”.

“Kjo Qeveri kishte premtuar se do ta bëjë Dubravën 12 kat, e në fakt si erdhën në pushtet morën në mbrojte mafinë energjetike, në krye me Martinin e Nagipin. Ajo çka po shohim, është se korrupsionin nuk e kanë ndërmend ta luftojnë, e duart i kanë gjithçka përveçse të pastra. Dëshmitë dhe raportimit të sotme tregojnë çartë për përfshirjen direkte të instancave më të larta të Lëvizjes Vetëvendosje, në aferat korruptive të Martin Berishaj dhe Nagip Krasniqit”, ka thënë ai.

Azemi, ka shtuar se Qeveria ka mbrojtur njeriun e korruptuar duke qenë plotësisht në dijeni për vërtetësinë e akuzave ndaj Berishajt.

“Mos të harrojmë që kjo qeveri e mbrojti me ngulëm Martin Berishaj, gjatë raportimeve të shumta për aferat e tij korruptive në tregun e energjisë. Po bindemi sërish se kjo qeveri e ka mbrojtur njeriun e korruptuar, duke qenë plotësisht në dijeni për vërtetësinë e akuzave. A mundet sot të besoj dikush se Kryeministri nuk ka qenë në dijeni për këtë që po ndodh, për korrupsionin që sillet përreth tij çdo ditë? Po shihet çartë se diçka e tillë çdo ditë e më shumë po është vështirë e besueshme”, ka shtuar ai.

Ai ka ritheksuar se keqpërdorimet më të mëdha në krizën energjetike ishin në KEK, duke vazhduar edhe me tenderët një burimore të cilët sipas tij, shkuan në vlera multi-milionëshe.

“A po vjen te ne…me kapelë :)”.

Kështu i drejtohet me ftestë për takim në seli të Vetëvendosjes Dejona Mihali – formalisht Koordinatorja e Komiteteve Profesionale në Vetëvendosje – ish-Kryeshefit të Korporatës Energjetike (KEK), Nagip Krasniqit, tash të arrestuar dhe me aktakuzë nga Prokuroria Speciale për dyshime të dëmtimit të buxhetit të shtetit për mbi 3 milion euro.

Nacionale ka siguruar komunikimet e Dejona Mihalit me Nagip Krasniqin në platformën “Signal” – ku përkthehet një tablo udhëzimi e menaxhimi nga Mihali ndaj Krasniqit se çka të bëjë e çka jo.

Mihali qe intervistuar nga Prokuroria Speciale javë më parë mu për këto komunikime. Pretendoi se u intervistua nga prokuroria “për ta zbardhur të vërtetën”:

Por, e vërteta del të jetë që Krasniqi del të ketë qenë i udhëzuar skajshmërisht nga Mihali, e cila i kërkon llogari, pyet, dërgon, informon për gjëra në lloj-lloj sferash: prej atyre energjetike e politike.

Të kthehemi te mesazhi i sipërm, kur Mihali e fton në objekt të Vetëvendosjes: por, ia bën me dije që të shkojë i kamufluar: “…me kapelë” të cilës ia shoqëron edhe një ‘smajll’.

Dejona Mihali i kërkon takim Nagip Krasniqit:

Mihali: “Po duam të të takojmë me Gazmendin. Kur mundemi?”

Krasniqi: “Të shtunën?”

Mihali: “Të shtunën kam këshill, të pretem në pasdite/mbrëmje?”

Krasniqi: “Jam në Vjenë. Kthehem nesër. Të premten kam mbledhje të bordit tërë ditën”.

Mihali: “Të dielën në 12:00”

Krasniqi: “Në rregull”

Mihali: “A po vjen te…me kapelë J”

Kur në Kosovë kishte shpërthyer skandali për përfshirjen e ambasadorit Martin Berishaj në dallaveret me rrymë nëpërmjet kompanisë GEN, shqetësimi duket se ishte prezent në figurat e larta të Vetëvendosjes.

Në komunikimet që i ka siguruar gazeta Nacionale ndërmjet Dejona Mihalit dhe Nagip Krasniqit, del se Mihali e përcillte me vëmendje secilin raportim për këtë skandal energjetik. Ato, ia përcillte ish-kryeshefit të KEK-ut.

Madje, në njërën prej bisedave, Mihali e informon Nagip Krasniqin për shkrimet e mediave se kompania GEN e lidhur me Martin Berishajn, kishte përfituar 4.2 milionë euro gjatë kohës së krizës energjetike.

Para këtij raportimi, dorëzohet edhe Nagip Krasniqi i cili e konfirmon se “pak a shumë është i vërtetë”.

Mihali ia ka dërguar Krasniqit linkun e portalit Reporteri, përderisa reagimi i Nagip Krasniqit ishte i menjëhershëm.

“Pak a shumë e vërtetë”, thuhet në përgjigjen e Nagip Krasniqit, në bisedat të cilat i ka siguruar Nacionale.

Ajo që mbrohej me kërshëri nëpër media nga zyrtarët e pushtetit, del se nuk amnistohej edhe në komunikimet private.

Pra, Nagip Krasniqi, në bisedat private, ia konfirmon Dejona Mihalit, se përfshirja e Martin Berishajt në kompaninë GEN dhe përfitimet që kjo kompani ka marrë nga Kosova, janë “pak a shumë të vërteta”.

Bisedat për këtë temë, nuk ndalen.

Pas artikullit të parë, Dejona Mihali ia dërgon Nagip Krasniqit një deklaratë të Ramush Haradinajt, i cili kërkonte llogari nga Albin Kurti për skandalin me rrymë ku ishte i përfshirë Martin Berishaj.

Kjo nuk u përcoll me ndonjë reagim nga Nagip Krasniqi.

Në një tjetër shkëmbim mesazhesh në ‘Signal’, Dejona Mihalit e njofton Nagip Krasniqin për komisionin hetimor, dhe importin e rrymës.

“A je duke i ndjekur? Po sulmojnë për komisionin hetimor dhe për importin”, ia shkroi Dejona Mihali.

“Jo. Skam nerva”, ia ktheu Nagip Krasniqi.

Dejona Mihali, komisarja e VV-së, më pas vazhdon me kërkesa të qarta duke kërkuar shpjegime.

“Na nevojiten shpjegimet. Jo vetëm ne, por edhe Artanes”, thuhet në mesazhin e Mihalit.

“Dërgoni pyetjet”, ishte mesazhi tjetër i Nagip Krasniqit.

“Si urdhëron” ia kthen Mihali, mesazh i cili përcillet me pak humor “hahaha” nga Nagip Krasniqi.

Se Dejona Mihali ishte e përfshirë në secilin detaj e secilin veprim që ndërmerrej brenda KEK-ut, e konfirmon edhe një tjetër mesazh.

Mihali ia përcjell Krasniqit një link i cili flet për kryetarin e Sindikatës së KEK-ut. Aty, Mihali e pyet Nagip Krasniqin nëse kanë kontakte me këtë person.

“A mbani kontakte me këta a hiç”, pyet Mihali.

Për këtë përfshirje të Mihalit, ajo ishte intervistuar nga Prokuroria Speciale e Kosovës.

Pas intervistimit, Mihali kishte deklaruar se “u ftua për ta zbardhur të vërtetën”.

Nacionale sot gjatë ditës dhe nesër do të vazhdojë me publikimin e mesazheve të tjera ku është e përfshirë Dejona Mihali dhe Nagip Krasniqi.

Si pyetej për gjithçka Dejona Mihali nga Nagip Krasniqi?

Në cilat punësime ishte e përfshirë Dejona Mihali dhe kryeministri Kurti?

Si kamuflohej Nagip Krasniqi për të shkuar në zyret e VV-së për të diskutuar për këto tema?

Si e ofendonte Dejona Mihali Lidhjen Demokratike e Kosovës?

Si vendoste Dejona Mihali kur do të kishte reduktime të rrymës?

Të gjitha këto do të publikohen gjatë ditës.

Ambasadori i Kosovës, Martin Berishaj, dyshohet nga Prokuroria Speciale për shpërlarje parash.

Për këtë ai ishte intervistuar muaj më parë nga Prokuroria Speciale e Kosovës.