Ngritja e kapaciteteve ushtarake të Kosovës temë kyçe diskutimit mes Gërvallës dhe McKay

Bashkëpunimi në fushën e mbrojtjes dhe sigurisë dhe forcimi i partneritetit mes dy shteteve në ngritjen e kapaciteteve ushtarake të Kosovës ishin temat kryesore në takimin që Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, bashkë me Kryetaren e Grupit Parlamentar të Miqësisë Kosovë-Kanada, Mimoza Kusari-Lila patën me John McKay, Kryetar i Komisionit të Përhershëm për Mbrojtje Kombëtare në Parlamentin e Kanadasë, në kuadër të vizitës zyrtare në Kanada.

“Avancimi i statusit të Republikës së Kosovës në anëtare e asociuar në Asamblenë Parlamentare të NATO-s, përgatitja dhe profesionalizmi i ushtrisë së Kosovës, i arritur si rezultat i bashkëpunimit me shtetet anëtare të NATO-s dhe sipas standarteve të tyre ushtarake, ishin po ashtu pjesë e diskutimit mes Ministres Gërvalla dhe deputetit federal, John McKay.”, thuhet në njoftimin e Ministrisë së Punëve të Jashtme.

Gjithashtu bëhet e ditur se, krahas aspekteve të mbrojtjes dhe sigurisë, gjatë këtij takimi Ministrja Gërvalla e njoftoi Kryetarin McKay rreth progresit të arritur nga Republika e Kosovës në fushën e demokratizimit të vendit, sundimin e ligjit, lirinë e shprehjes, respektimin e të drejtave të njeriut dhe zhvillimin ekonomik./21Media