Osmani do të marrë pjesë në ceremoninë hapëse të Lojërave Olimpike “Paris 2024”
Presidentja e Kosovës, Vjosa Osmani, me ftesë të Presidentit të Republikës Emmanuel Macron dhe të Presidentit të Komitetit Olimpik Ndërkombëtar, Thomas Bach, ka udhëtuar për në Paris për të marrë pjesë krahas liderëve të shumtë botërorë, në ceremoninë hapëse të Lojërave Olimpike Paris 2024, dhe për t’i mbështetur 9 sportistët që do ta përfaqësojnë Kosovën në këto Lojëra.
Kjo u bë e itur përmes një komunikate pëe media ku thuhet se me këtë rast, Presidentja Osmani ka potencuar se për Kosovën, pjesëmarrja në Lojëra Olimpike paraqet kulmin e punës së palodhur, përkushtimit dhe vendosmërisë së sportistëve tanë.
“Është një dëshmi e qëndrueshmërisë së shtetit tonë dhe aftësisë për t’u ngritur mbi sfidat dhe për të shkëlqyer në skenën botërore”, ka thënë Osmani.
Tutje bëhet e ditur se në kuadër të vizitës në Paris, Osmani do të marrë pjesë në Samitin “Sporti për zhvillim të qëndrueshëm”, i cili organizohet nga Presidenti i Republikës së Francës, Emmanuel Macron.
“Gjatë qëndrimit në Paris, Presidentja Osmani e shoqëruar nga Zotëria i parë, Prindon Sadriu, janë të ftuar në pritjen e organizuar nga Presidenti i Francës në Pallatin Elize dhe në të njëjtën kohë do ta ndjekin paraqitjen e sportistëve të Republikës së Kosovës në Trokadero. Ata gjithashtu janë të ftuar edhe në darkën e organizuar nga Presidenti i Komitetit Olimpik Ndërkombëtar”, thuhet në komunikatë për media.
Kosova në Lojërat Olimpike Paris 2024, do të përfaqësohet me 9 sportistë në disa diciplina sportive.
“Presidentja Osmani ka uruar garuesit e Kosovës dhe ka shfaqur bindjen se ata do ta përfaqësojnë denjësisht Republikën e Kosovës si dhe do të kthehen faqebardhë nga Parisi”, përfundon komunikata./21Media
