Kryetar i Komisionit qeveritar për personat e pagjetur, Andin Hoti, reagoi pas miratimit të Deklaratës për të Zhdukurit nga lufta e fundit në Kosovë, nga kryeministri i Kosovës ALbin Kurti dhe presidenti serb Aleksandar Vuçiq në Bruksel.
Hoti tha se me miratimin e kësaj deklarate Serbia pranoi krimet shtetërore ndaj popullit të Kosovës.
“Ashtu siç e kam thënë me datë 4 Prill, Serbia më në fund pranoi krimet e saj shtetërore ndaj popullsisë së pambrojtur të Kosovës, duke i cilësuar të zhdukurit si ‘të zhdukur me dhunë’, që parashihen edhe në konventa ndërkombëtare.Serbia për herë të parë pranoj përmes një dokumenti zyrtar, ti hap arkivat e saj shtetërore, përfshirë edhe ato të klasifikuara.”, shkroi Hoti në Facebook.
Ai u shpreh i bindur se Deklarata e miratuar është vetëm hapi i parë që sipas tij kërkon domosdoshmërisht mbikëqyrje dhe presion të vazhdueshëm të SHBA-ve e BE-së mbi Serbinë, për zbatimin obligimeve të marra, deri në zbardhjen e fatit të personit të fundit të zhdukur në Kosovë.
