Presidenti i Shteteve të Bashkuara të Amerikës, Joe Biden ka folur me presidentin e Ukrainës, Volodymyr Zelensky.
Jen Psaki, zëdhënëse e Shtëpisë së Bardhë, ka thënë për CNN se Biden ka folur me Zelenskyn për 35 minuta.
Pas fjalimit televiziv të presidentit rus Vladimir Putin, Zelensky ka bërë të ditur se një takim ka filluar të mbahet nga Këshilli i Sigurisë Kombëtare dhe Mbrojtjes së Ukrainës.
“Kam diskuar ngjarjet e orëve të fundit me presidentin Joe Biden. Ne do të fillojmë takimin e Këshillit të Sigurisë dhe Mbrojtjes Nacionale. Është planifikuar edhe një bisedë me kryeministrin e Britanisë së Madhe, Boris Johnson”, ka shkruar Zelensky në Twitter.
Putin ka nënshkruar sot dekretin për njohjen e pavarësisë së rajoneve ukrainase, Donetsk dhe Luhansk, të cilat kontrollohen pjesërisht nga separatistët e mbështetur nga Rusia.
Ndërkohë liderët e Perëndimit kanë paralajmëruar për pasoja të rënda nëse Rusia njeh pavarësinë e këtyre rajoneve./21Media
