Barkodet ndërkombëtare do të jenë së shpejti realitet edhe për produktet e Kosovës në tregjet ndërkombëtare.
Kryetari i Odës Ekonomike të Kosovës, Lulzim Rafuna, ka zhvilluar një takim me kryetaren e Fondacionit GS1 Turqi, Elif Muftuoglu, me ç’rast gjatë takimit, u shpreh mirënjohje për mbështetjen e vazhdueshme që GS1 Turqia i ka dhënë Kosovës në procesin e anëtarësimit në rrjetin ndërkombëtar të barkodave GS1 – sistem që siguron identifikim dhe njohje globale të produkteve.
“Falë këtij bashkëpunimi, GS1 Kosova do të nisë me sukses lëshimin e barkodave ndërkombëtare, duke i hapur rrugë produkteve të Kosovës për njohje dhe prezencë më të gjerë në tregjet ndërkombëtare”, thuhet në njoftim.
Sipas OEK, ky hap do të shtojë vlerën, besueshmërinë dhe sigurinë e produkteve kosovare, si për konsumatorët vendorë ashtu edhe për ata ndërkombëtarë.
Oda Ekonomike e Kosovës shpreh mirënjohje të veçantë për GS1 Turqinë dhe Elif Muftuoglu për bashkëpunimin e sinqertë dhe përkrahjen profesionale në këtë proces të rëndësishëm për zhvillimin ekonomik të vendit, raporton KosovaPress.
Falë GS1, produktet e regjistruara në Kosovë mund të identifikohen dhe gjurmohen globalisht, duke mundësuar qasje më të lehtë në tregjet ndërkombëtare, efikasitet në logjistikë dhe transparencë në zinxhirin e furnizimit.
