Punëtorët e KEK-ut e konsiderojnë padrejtësi përfshirjen në Ligjin për Paga
Ligji për Paga ka sjellë pakënaqësi
Sindikata e punëtorëve të KEK-ut po proteston para Qeverisë së Kosovës, në shenjë revolte ndaj Ligjit për Paga. Nexhat Llumnica nga Sindikatë e punëtorëve të KEK-ut ka thënë se është e papranueshme përfshirja e kësaj ndërmarrje në këtë Ligj dhe e kanë konsideruar padrejtësi.
“Nuk ka vend në botë që kompanitë e tilla si Korporata Energjetike e Kosovës hyn në buxhetin për paga nga Qeveria e Republikës së Kosovës”, ka thënë Llumnica dhe ka treguar se iu kanë bërë shkresë ministrive përkatëse që të bëjnë interpretimin e ligjit.
Më tej protestuesit kanë bërë thirrje për pushtetarët që të mos i bien në atë gjendje punëtorët që t’i mbyllin dyert e objekteve dhe të dalin në protestë. Protestën e sotme e kanë konsideruar si paralajmërim.
Më 2 shkurt, Kuvendi i Kosovës ka miratuar Ligjin për Pagat. Teksti në përgjithësi më amendamentet e propozuara në Projektligji për pagat në sektorin publik u votua me 63 vota pro asnjë kundër dhe një abstenim./21Media
