Rreth 2 mijë pacientë në listën e pritjes në Klinikën e Kardiologjisë
Klinika e Kardiologjisë e Qendrës Klinike Universitare të Kosovës (QKUK) ka njoftuar për situatën aktuale të listave të pritjes, duke sqaruar se falë angazhimit të shtuar profesional dhe organizativ është shënuar rritje e ndjeshme e vëllimit të punës dhe ulje e numrit të pacientëve në pritje.
Sipas njoftimit, aktualisht në Klinikën e Kardiologjisë realizohen rreth 18 procedura në ditë, me qëllim të drejtpërdrejtë për të reduktuar listat e pritjes. Para përfshirjes së çdo pacienti në listën e pritjes, dokumentacioni mjekësor shqyrtohet nga një komision profesional, i përbërë nga mjekë dhe infermierë, i cili vlerëson urgjencën dhe gjendjen klinike të pacientëve. Rastet urgjente, theksohet në njoftim, trajtohen menjëherë dhe nuk i nënshtrohen listës së pritjes.
Në Klinikën e Kardiologjisë janë të angazhuar rreth 40 kardiologë, prej të cilëve 16 janë të profilit invaziv, të specializuar në diagnostikimin dhe trajtimin e sëmundjeve ishemike të zemrës, vendosjen e stentave dhe ndërhyrje të tjera të avancuara. Stafi mjekësor, sipas klinikës, mbetet i përkushtuar në rritjen e volumit të punës pa cenuar sigurinë dhe cilësinë e shërbimeve shëndetësore.
Bazuar në raportin për vitin 2025, i cili përfshin nëntë muaj pune, Klinika e Kardiologjisë ka arritur pothuajse nivelin e vitit 2024 sa i përket numrit të koronarografive, ndërsa është shënuar edhe një volum i lartë i vendosjes së stentave. Këto të dhëna, sipas klinikës, dëshmojnë intensifikimin e punës mujore dhe projeksion për tejkalim të rezultateve vjetore deri në fund të vitit.
Përkundër faktit se gjatë vitit të kaluar në listën e pritjes ishin 4,560 pacientë, aktualisht ky numër është ulur në rreth 2,000 pacientë, duke shënuar një rënie të ndjeshme të listave të pritjes.
