Rritet numri i amerikanëve të vrarë gjatë konfliktit Izrael-Hamas
(Lajm i përditësuar)
Biden: SHBA vazhdon të monitorojë situatën në Izrael pas bisedimeve me Netanyahun
SHBA vazhdon të monitorojë situatën në Izrael, tha të mërkurën presidenti Joe Biden.
Në një fjalim, Biden tha se foli me kryeministrin izraelit Benjamin Netanyahu herët të mërkurën.
Thirrja është komunikimi i katërt midis dy liderëve që nga sulmi i Hamasit më 7 tetor dhe reagimi i mëpasshëm i fuqishëm i Izraelit në Rripin e Gazës.
Presidenti amerikan përsëriti se nuk ka asnjë justifikim për terrorizmin.
“Angazhimi im për sigurinë e Izraelit dhe sigurinë e popullit hebre është i palëkundur. Shtetet e Bashkuara kanë kurrizin e tij dhe ne do të punojmë për këtë gjatë gjithë ditës dhe më gjerë,” shtoi ai.
Konflikti filloi të shtunën kur Hamasi nisi Operacionin “Al-Aksa Flood” kundër Izraelit – një sulm i papritur i shumëfishtë duke përfshirë një breshëri lëshimesh raketash dhe infiltrimesh në Izrael nëpërmjet tokës, detit dhe ajrit.
Hamasi tha se operacioni ishte në hakmarrje për sulmin ndaj xhamisë Al-Aksa në Jerusalemin Lindor të pushtuar dhe dhunës në rritje të kolonëve izraelitë kundër palestinezëve.
Ushtria izraelite nisi Operacionin “Shpatat e Hekurta” kundër objektivave të Hamasit brenda Rripit të Gazës si përgjigje.
Kjo përgjigje është shtrirë në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në një zonë që është përfshirë nën një rrethim të madh që nga viti 2007.
Rritet numri i amerikanëve të vrarë gjatë konfliktit Izrael-Hamas
Numri i shtetasve amerikanë të vrarë gjatë konfliktit Izrael-Hamas është rritur në të paktën 22, njoftoi Departamenti amerikan i Shtetit më 11 tetor.
Një ditë më herët, autoritetet amerikane kishin njoftuar se 14 amerikanë ishin vrarë në Izrael.
Po ashtu, shtetas amerikanë ka në mesin e afër 150 pengjeve të marra nga militantët e Hamasit, gjatë sulmit të tyre të befasishëm ndaj Izraelit më 7 tetor. Kështu ka konfirmuar të martën presidenti amerikan, Joe Biden.
Deri më tani, dhuna ka lënë të vrarë të paktën 2.200 persona në të dyja anët.
Shkon në 1 mijë e 100 numri i viktimave në Gaza
Numri i të vdekurve në Gaza nga sulmet ajrore izraelite është rritur në 1,100, thotë një përditësim nga Ministria e Shëndetësisë e drejtuar nga Hamasi në territor.
Sipas shifrave të reja të publikuara në Facebook, ministria thotë se numri i përgjithshëm i personave të lënduar tani është 5,339.
Netanyahu njofton për formimin e “Qeverisë së luftës”
Kryeministri i Izraelit, Benjamin Netanyahu, njoftoi më 11 tetor për formimin e një “qeverie emergjente” me liderin e partisë opozitare, Benny Gantz. Ekzekutivi do të udhëheqë me shtetin gjatë periudhës së luftës me militantët palestinezë të Hamasit.
“Pas takimit të mbajtur sot, të dy janë pajtuar për formimin e një Qeverie emergjente dhe të një kabineti të luftës”, u tha në deklaratën e përbashkët të lëshuar nga Netanyahu dhe Gantz, i cili në të kaluarën ka qenë ministër i Mbrojtjes dhe shef i ushtrisë.
“Qeveria e luftës” përbëhet nga Netanyahu, Gantz dhe nga ministri i Mbrojtjes, Yoav Gallant.
Sipas njoftimit, Gadi Eisenkot, ish-shefi i ushtrisë nga partia e Gantzit, dhe ministri për Çështje Strategjike, Ron Dermer, do të shërbejnë si vëzhgues në këtë ekzekutiv.
Lideri opozitar, Yair Lapid, nuk i është bashkuar ish-aleatit të tij Gantz, por në njoftim u tha se një vend në Qeverinë e luftës do të jetë “i rezervuar” për të.
Të paktën shtatë gazetarë të vrarë në Rripin e Gazës
Të paktën shtatë gazetarë janë vrarë në Rripin e Gazës që kur Hamasi filloi sulmin e tij të shtunën.
Fondacioni Ndërkombëtar i Medias së Grave (IWMF) bën thirrje për sigurinë e raportimit të gazetarëve në rajon.
”Mes shqetësimeve dhe trazirave globale, gazetaria e pavarur është thelbësore për ndarjen e informacionit të besueshëm me publikun. Ne qëndrojmë në mbështetje të gazetarëve dhe kërkojmë që shtypi dhe civilët të mbrohen gjatë krizës ‘, thuhet ndër tjera në reagimin e IWMF-së.
Gaza mbetet pa rrymë
Termocentrali i vetëm në Rripin e Gazës, që është nën rrethimin e Izraelit, është mbyllur më 11 tetor, pasi ka mbetur pa karburant, thanë autoritetet palestineze.
“I vetmi termocentral në Rripin e Gazës ndaloi operimin në orën 14:00 ”, tha kreu i autoritetit të energjisë në rripin e Gazës, Jalal Ismail, përmes një deklarate.
Kompania e energjisë që operon termocentralin kishte paralajmëruar disa orë më herët se termocentrali ishte në rrezik që të ndalte prodhimin.
Kjo kompani tha se Gaza do të ketë qasje në energjinë që prodhohet përmes energjisë diellore, por do të jetë e mjaftueshme vetëm për 10 orë rrymë në ditë.
Mbyllja e termocentralit vjen pasi Izraeli në fillim të javës njoftoi për bllokimin e dërgesave me karburante në Rripin e Gazës, si pjesë e asaj që Qeveria izraelite e quajti “rrethim të plotë” të territorit që udhëhiqet nga grupi i militantëve palestinez, Hamas.
