Një sulm me raketa ruse në një bazë ushtarake ukrainase që ndodhi dje pranë kufirit polak, ishte një përpjekje për të “kërcënuar” NATO-n, tha për BBC zëvendësministri i Jashtëm i Polonisë, Marcin Przydacz.
Të paktën 35 njerëz vdiqën në sulmin në bazën e trajnimit Yavoriv, rreth 20 km nga kufiri me Poloninë.
Przydacz tha se lëvizja e Rusisë ishte “shumë provokuese”.
“Ata me siguri e dinin se kjo bazë ushtarake ishte vendosur shumë afër kufirit polak”, u shpreh ai.
“Pra, natyrisht, rusët e dinin se çfarë po goditnin dhe donin të kërcënonin NATO-n… Ata donin të dërgonin një mesazh duke kërcënuar NATO-n.”
Przydacz shtoi se ka frikë se “vendi im dhe disa vende të tjera janë disi në rrezik pasi Putin po përpiqet të shkatërrojë botën në të cilën po jetojmë”./21Media
