“Të merremi me shtëpinë, jo shpuzoren”, përplasen pozita dhe opozita në Kuvendin komunal të Rahovecit
Mbledhja e Kuvendit komunal të Rahovecit është shoqëruar me përplasje të shumta në mes opozitës dhe pozitës. Shkak për këtë është bërë ndërrimi i pikave të rendit të ditës. Sipas asamblistëve të opozitës, pika pyetje-përgjigje duhej të ishte pika e tretë e rendit të ditës.
Për kryetarin e Komunës, Smajl Latifi, kjo çështje nuk është dashur t’i jepej kaq rëndësi sepse sipas tij e rëndësishme është të arrihet zgjidhja dhe jo renditja. Ai këtë gjë e shtjelloi në formën e një anekdote por që nuk u prit mirë nga kundërshtarët e tij politik.
I menjëhershëm ka qenë reagimi nga asamblisti nga radhët e Vetëvendosjes, Defrim Kafexhiu, duke thënë se shtëpia të cilën e përmendi kryetari në anekdotë i është vënë zjarri.
Këtij mendimit iu bashkua edhe bashkëpartiaku i Kafexhiut, Ilir Pllaqa duke shtuar se kryetari Latifi është duke folur më shumë në cilësinë e shefit të Partisë së Aleancës për Ardhmërinë e Kosovës se sa si i pari i komunës.
Por në lidhje me këtë, Hasan Perboqi nga Aleanca për Ardhmërinë e Kosovës mendon se këto diskutime janë të panevojshme dhe se ka një mori pikash më të rëndësishme se pika pyetje përgjigje, gjithashtu ai ka shtuar se komuna e Rahovecit është duke e bërë më të mirën për qytetarët.
Por kjo gjë është kritikuar nga Burim Krasniqi nga radhët e Lidhjes Demokratike të Kosovës. Sipas tij, suksesi i një komune nuk varet nga numrat se sa i ka një parti politike, por kur suksesi kalon numrat.
