Ministri i Jashtëm ukrainas, Dmytro Kuleba tha se negociatat e paqes me Rusinë janë të vështira dhe mohoi raportet se ishte bërë përparim në zgjidhjen e katër nga gjashtë çështjet kryesore.
Kjo vjen pasi një anëtar i ekipit negociator rus tha më herët se të dyja palët po afroheshin drejt një mirëkuptimi për çështje dytësore. Presidenti turk, Recep Tayyip Erdoğan u raportua gjithashtu se tha se ishte bërë përparim në bisedimet.
Por, Kuleba tha se “nuk ka konsensus me Rusinë për katër pikat”, shkruan BBC, përcjell rtv21.tv
“Procesi i negociatave është shumë i vështirë”, shkroi ai në Facebook. “Delegacioni ukrainas ka marrë një qëndrim të fortë dhe nuk heq dorë nga kërkesat e tij. Ne insistojmë, para së gjithash, për një armëpushim, garancitë e sigurisë dhe integritetin territorial të Ukrainës.”
Kuleba më vonë shkroi në Twitter se “nuk kishte ende konsensus në negociata”dhe shtoi “Rusia i qëndron ultimatumeve”.
“Për të stimuluar një qasje më konstruktive, ne kemi nevojë për dy gjëra: më shumë sanksione dhe më shumë ndihmë ushtarake për Ukrainën”, shtoi tutje ai./21Media
