Vazhdon shkyçja e konsumatorëve për mospërditësim të të dhënave në KESCO

KESCO përmes një njoftimi ka bërë të ditur se të gjithë konsumatorët të cilët furnizohen me energji elektrike nga ky dikaster, e kanë obligim ligjor që të lidhin kontratë të furnizimit me kompaninë.

“Rregullimi i marrëdhënieve kontraktuale me furnizuesin është proces i thjeshtë dhe i lehtë për të gjithë konsumatorët anekënd Kosovës. Mjafton të vizitohet pika më e afërt dhe aty do t’u sqarohet i gjithë procesi”, thuhet në njoftim.

KESCO paralajmëron se kush nuk përditëson të dhënat nga data e informimit nga furnizuese shkyçet nga energjia elektike.

“Kushdo që nuk e bën këtë brenda dy javësh që nga data e informimit prej furnizuesit, në këtë rast KESCO-s, shkyçet nga rrjeti elektrik. Këtë e bëjmë në vazhdimësi, posa të kalon ky afat i përcaktuar nga legjislacioni, dhe do të vazhdojmë të bëjmë aksione të tilla edhe ditëve në vazhdim. Marrë parasysh rolin e rëndësishëm që kanë të dhënat e sakta dhe të përditësuara në sektorin e energjisë, KESCO po ndërmerr masa proaktive për të rritur efikasitetin operacional, për të siguruar kënaqëshmërinë e konsumatorëve dhe për të mbështetur pajtueshmërinë rregullative”, njofton KESCO. /21Media