“Vrasjet e grave të trajtohen si urgjencë kombëtare”

“VRASJET E GRAVE TË TRAJTOHEN SI URGJENCË KOMBËTARE!” – kjo ishte thirrja që u bë sot në protestën e mbajtur nga Kolektivi për Mendim dhe Veprim Feminist.

“Sot, marshuam nga Ministria e Drejtësisë për tek Ministria e Punëve të Brendshme e në fund tek Qeveria, ku hodhëm edhe ngjyrë të kuqe, si revoltë kolektive ndaj vrasjes së grave e indiferencës institucionale. Vrasja e fundit, sikundër të gjitha rastet e femicidit në Kosovë, të shkaktuara nga burrat, është bërë me ndërmjetësimin e shtetit. Prandaj kjo protestë, përveç kundërshtimit e mllefit tonë, ishte për t’i dhënë alarmin e fundit Qeverisë që ta kthejë vëmendjen tek femicidi dhe t’i trajtojë vrasjet e grave si urgjencë kombëtare”, thuhet në një postim në Facebook.

Kujtojmë se, Kolektivi për Mendim dhe Veprim Feminist, me anë të një video mesazhi në Facebook, ka paralajmëruar dje se do të mbajnë marsh protestues te Ministria e Drejtësisë dhe sipas njoftimit, ky organizim do të mbahet kundër vrasjes së grave dhe nevojës për trajtim të femicidit si urgjencë kombëtare./21Media