Arrestohen 11 persona të dyshuar për mashtrim me patentë-shoferë
Policia e Kosovës ka arrestuar 11 persona në disa komuna.
Sipas njoftimit të Policisë, të njëjtit dyshohen për dallavere me patent-shoferë.
Policia ka njoftuar se të enjten gjatë ditës ka realizuar planin operativ “Patenta” duke kontrolluar 10 lokacione të ndryshme në këto tri komuna. Lokacionet përfshinin shtëpi private, zyra rajonale të Ministrisë së Infrastrukturës, koordinatorë/ekzaminerë dhe biznese me veprimtari të autoshkollës.
Sipas njoftimit, hetimet kanë nisur muaj më parë dhe janë aplikuar masa të veçanta për të siguruar dëshmi të mjaftueshme për keqpërdorim të detyrës zyrtare, pranim ryshfeti, ushtrim ndikimi e armëmbajtje pa leje.
Komunikata e Policisë
Policia e Kosovës respektivisht Drejtoria për Hetimin e Krimeve Ekonomike dhe Korrupsionit me datën 29.05.2025 sipas Planit Operativ “PATENTA” ka realizuar urdhëresën e Gjykatës Themelore Prishtinë me ç’rast në rajonin e Prishtinë , Gjilanit dhe Gjakovës janë kontrolluar 10 lokacione të ndryshme si; shtëpi private, zyrat rajonale të MMPHI-së -koordinatorë/ekzaminerë dhe biznese me veprimtari të auto shkollës.
Hetimet për ketë rast kanë filluar muaj më parë me ç’rast janë aplikuar masat e veçanta të hetimit përmes të cilave janë arritur të sigurohen dëshmi të mjaftueshme për veprat penale ’Keqpërdorim i pozitës apo autoritetit zyrtar’’, “Pranimi i ryshfetit në sektorin privat”, “Ushtrim ndikimi” dhe “Mbajtja në pronësi, kontroll ose posedim të paautorizuar të armëve”, duke u dëshmuar se njëmbëdhjetë të dyshuar meshkuj kosovarë në forma të ndryshme në vazhdimësi kanë ndihmuar kandidatë të shumtë për tu pajisur me patentë shofer të kategorive të ndryshme, me qëllim të përfitimit material për vete apo për persona të tjerë, gjithnjë në kundërshtim me ligjin.
Gjate kontrollit janë sekuestruar provat si në vijim :
një AK47,
dy revole,
224 copë fishekë të kalibrave të ndryshëm,
para të gatshme (16.145 euro dhe 6660 franga zvicerane),
17 telefona mobil,
3 PC,
2 USB
si dhe dokumentacion relevant për procedurë të mëtejme hetimore.
Lidhur me rastin personat e dyshuar janë shoqëruar për intervistim dhe me vendim të prokurorit dhjetë prej tyre janë dërguar në mbajtje për 48 ore, ndërsa një është liruar në procedurë të rregullt.
