Astronautja Suni Williams ka thyer rekordin e femrave për kohën totale të një ecjeje në hapësirë ose 62 orë e gjashtë minuta, duke tejkaluar Peggy Whitson që mbante këtë rekord deri më tash prej 60 orë e 21 minutash.
Të mbërthyer në Stacionin Ndërkombëtar Hapësinor (ISS) që nga qershori 2024, Suni Williams dhe Butch Wilmore përfunduan ecjen e tyre në hapësirë të enjten.
Gjatë këtij aktiviteti jashtë stacionit hapësinor, ata hoqën pajisjet radio që nuk funksiononin dhe mblodhën mostra për testimin e mikroorganizmave në guaskën e jashtme të ISS.
“Astronautja e NASA-s Suni Williams sapo ka tejkaluar kohën totale të ecjes hapësinore të ish-astronautes Peggy Whitson prej 60 orë e 21 minutash”, njoftoi NASA në X.
Kohëzgjatja fillestare e misionit për Williams dhe Wilmore u caktua në vetëm tetë ditë, por ajo u zgjat në 238 ditë, duke nxitur diskutime rreth masave paraprake të nevojshme për mirëqenien e astronautëve gjatë qëndrimeve të tilla të zgjatura.
NASA tha se i njihte sfidat e këtij misioni të zgjeruar dhe po punonte ngushtë me SpaceX për të siguruar kthimin e sigurt të astronautëve në Tokë.
