Chelsea-PSG, publikohen formacionet zyrtare të finales së Botërorit të Klubeve
Chelsea dhe PSG-ja luajnë sot finalen e madhe të Botërorit të Klubeve në “MetLife Stadium” të New Jersey, duke filluar nga ora 21:00 me orën tonë.
Nga një anë janë anglezët që kanë bërë detyrën duke fituar 5 nga 6 ndeshjet e luajtura me një lojë mjaft bindëse, edhe pse nuk kanë pasur përballë pengesa shumë të forta në rrugëtimin e tyre.
Nga ana tjetër është PSG që ka treguar se fitorja në Ligën e Kampioneve nuk është aspak rastësi, teksa ka nxjerrë nga gara emra të rëndësishëm si Bayern Mynih e Real Madrid, ndërsa tregoi kundër spanjollëve forcën e vet me një fitore shkatërrimtare 4-0.
“Blutë” e nisin nga minuta e parë dy blerjet e reja Liam Delap dhe Joao Pedro, braziliani debutoi në gjysmëfinale ndaj ish-ekipit të tij, Fluminense, ku shënoi dy golat e fitores.
Po ashtu e fillon nga minuta e parë, Moises Caicedo, i cili ka pasur probleme fizike, por është rikthyer për finalen e sotme.
Te parisienët mungojnë Lucas Hernandez dhe Willian Pacho, për shkak kartonësh, por Luis Enrique ka hedhur në fushë formacionin më të mirë të mundshëm.
