Abdixhiku ngushëllon familjen Ferati: Në momente si këto, njeriu ngrinë nga fjalët

(Lajm i përditësuar)

Abdixhiku ngushëllon familjen Ferati: Në momente si këto, njeriu ngrinë nga fjalët

Kryetari i Lidhjes Demokratike të Kosovës (LDK), Lumir Abdixhiku, ka shprehur ngushëllime për familjen e kryetarit të Istogut, Ilir Ferati, me rastin e humbjes së vëllait të tij, Triumfit.

Abdixhiku thotë se në këto momente të rënda, i qëndron pranë familjes Ferati, transmeton klankosova.tv.

”Me të na iku dhe një mik, një aktivist e një njeri i jashtëzakonshëm. Pas vete na la veçse kujtimet, ato që të përmallojnë në plotni. Triumfi, apo Trimi siç e thërrisnim të gjithë, ishte një djalë i urtë e i dashur – ai gjithnjë rrezatonte përplot ngrohtësi. Tregonte kujdes e shprehte mbështetje ndaj secilit prej nesh! I kishte ngjarë të atit; bashkëshortit tuaj, asnjë habi. Ikja e tij e hershme është humbje jo vetëm për familjen tuaj, por dhe gjithë qytetin e Istogut e gjithë Lidhjen Demokratike të Kosovës! Në këto momente të rënda, unë e secili anëtar i Lidhjes, qëndrojmë afër me ju, me Besën e me Ilirin. Qenka e rëndë vizita në shtëpinë tuaj pa Trimin tonë mes jush. Zoti ju dhashtë forcë! Pusho në paqe Triumf!”, ka shkruar Abdixhiku.

Kurti ngushëllon familjen Ferati: Jemi bashkë në këto çaste të rënda

Kryeministri i Kosovës, Albin Kurti i ka shprehur ngushëllime familjes Ferati nga Istogu, për vdekjen e Triumfit.

Ai tha se kjo dhembje është e përbashkët.

“Na tronditi e pikëlloi thellë lajmi për humbjen e Triumf Feratit.Ngushëllimet e mia më të sinqerta për familjen Ferati, shokët e shoqet e Triumfit dhe mbarë Istogun. Shpresoj të mund të gjeni forcën në kujtimet e bukura me të. Jemi bashkë në këto çaste të rënda, në këtë dhembje që është e përbashkët. Shpirti i Triumfit pushoftë në paqe”, ka shkruar Kurti.

Konjufca shpreh ngushëllime për familjen Ferati

Kryetari i Kuvendit, Glauk Konjufca është shprehur i pikëlluar pas lajmit të vdekjes së djalit të të ndjerit, Fadil Feratit, Triumf Feratit.

“Thellësisht i pikëlluar për ikjen shumë të hershme të Triumf Feratit, djalit të Fadil Feratit, ish-kryetarit të komunës së Istogut e po ashtu vëllai i kryetarit aktual të Komunës së Istogut, Ilir Ferati. Ky është lajm i trishtë dhe i dhimbshëm për familjen, për shoqërinë, dhe për qytetin e Istogut dhe Kosovën”, ka shkruar Konjufca në Facebook.

Konjufca shprehu ngushëllimet ndaj familjes Ferati dhe shoqërisë së të ndjerit.

LDK ngushëllon kryetarin e Istogut për humbjen e vëllait

Lidhja Demokratike e Kosovës ka reaguar pas vdekjes së vëllait të kryetarit të Istogut, Ilir Feratit, Triumf Ferati.

Ndaj familjarëve të të ndjerit LDK-ja ka shprehur ngushëllimet e tyre, duke e kujtuar atë si shembull i të gjithëve për angazhimin e tij të paepur ndaj kauzave.

”Me trishtim të thellë, sot morëm lajmin e kobshëm për ndarjen nga jeta në moshë të hershme të Triumf Feratit, të birit të veprimtarit të madh, Fadil Ferati e vëllait të Ilirit. Triumfi ishte shembull për të gjithë në Lidhjen Demokratike të Kosovës, për përkushtimin dhe angazhimin e tij të paepur, në kauzat e vizionin e LDK-së në Istog e gjithandej Kosovës. Triumfi do të mbetet gjithmonë në kujtesën tonë si shembull i një djali të jashtëzakonshëm e një aktivisti të pandalur”, shkroi LDK-ja në Facebook.

Osmani ngushëllon familjen Ferati: Në këto çaste të rënda bashkëndjej me ju

Personi i cili u gjet i vdekur në varrezat e fshatit Gurakoc të Istogut është vëllai i kryetarit të Istogut, Ilir Ferati.

Presidentja e Vjosa Osmani ka ngushëlluar familjen Ferati, teksa ka thënë se bashkëndjen me ta për t’i kaluar këto momente të vështira.

​Në varrezat e Gurakocit të Istogut gjendet një person pa shenja jete

Një person, identiteti i të cilit nuk bërë i ditur dhe as mosha, është gjetur pa shenja jete sot pasdite në varrezat e fshatit Gurakoc të Istogut.

Zëdhënësi i policisë për rajonin e Pejës, Fadil Gashi, tha për kp se policia ka marrë informacionin rreth orës 16:45.