FC Barcelona ka zgjatur bashkëpunimin me mesfushorin Marc Bernal deri në qershor të vitit 2029. Lojtari firmosi kontratën e re të hënën në mëngjes në zyrat e klubit, në prani të presidentit Joan Laporta, nënkryetarit të parë Rafael Yuste dhe drejtorit sportiv, Deco.
“Është dita më e lumtur e jetës sime. Dy vite më parë nuk do ta besoja se do të ndodhte kjo. Ëndrra ime që kur isha fëmijë ka qenë Barcelona dhe tani është bërë realitet,” u shpreh Bernal pas firmës.
Mesfushori 18-vjeçar u rikthye këtë sezon pas një dëmtimi të rëndë në gju, që e mbajti jashtë fushave për pjesën më të madhe të edicionit të kaluar. “Duhet t’i marr gjërat hap pas hapi. Jam i bindur se Bernali më i mirë ende nuk ka ardhur,” theksoi ai, duke falënderuar klubin dhe stafin për mbështetjen gjatë kohës së rikuperimit.
Bernal, i cili ka përmendur Sergio Busquets si idhullin e tij, zbuloi se ish-kapiteni i Barcelonës i kishte dërguar një mesazh inkurajues gjatë lëndimit.
Në prag të ndeshjes së së mërkurës në Champions League ndaj PSG-së, talenti i Barcelonës shtoi: “Do të jetë një ndeshje e shkëlqyer. Ne jemi të motivuar dhe besoj se mund të kualifikohemi. Sa i përket së ardhmes, ëndrra ime është të fitoj trofe me Barçën për shumë vite.”/kp
