Agjencia e Menaxhimit Emergjent (AME) ka njoftuar se në 12 orët e fundit në vend janë regjistruar gjithsej 61 vatra zjarri.
Prej tyre, 9 vatra vazhdojnë të jenë aktive, ndërsa 52 të tjera janë lokalizuar falë ndërhyrjes së Njësive të Zjarrfikësve dhe strukturave mbështetëse.
Menaxhimi i situatës po bëhet në koordinim me Zjarrfikësit, Qendrat Operative 112 dhe Policinë e Kosovës, ndërsa të gjitha vatrat aktive janë nën monitorim të vazhdueshëm dhe ekipet janë ende në terren.
AME ka theksuar se, sipas vlerësimeve, gjendja është e menaxhueshme dhe ka shprehur mirënjohje për përkushtimin e Zjarrfikësve, Policisë së Kosovës, KFOR-it, komunave dhe qytetarëve që kanë ndihmuar në përballimin e situatës.
Ndërkohë, me zjarre janë duke u përballur edhe vendet e tjera të Ballkanit, përfshirë Shqipërinë dhe Malin e Zi.
Si pasojë e zjarreve një person ka humbur jetën dhe disa të tjerë kanë kërkuar ndihmë në ditët e fundit.
