Sindikata e Pavarur e Radiotelevizionit të Kosovës (SPRTK) dhe Shoqata Sindikale e Radio Kosovës kanë njoftuar se sot nga ora 11:00, do të mbajnë protestë para Kuvendit të Kosovës, në shenjë pakënaqësie për mospagesën e pagave dhe mos-ekzekutimin e buxhetit të RTK-së nga institucionet përgjegjëse shtetërore.
Sindikatat kanë shprehur shqetësimin e thellë dhe pakënaqësinë e punëtorëve të RTK-së, të cilët, siç kanë thënë kanë mbetur pa paga mujore, duke u përballur me vështirësi në përmbushjen e obligimeve ndaj bankave dhe nevojave bazike familjare.
“Vonesa të tilla të pajustifikueshme po e godasin drejtpërdrejt sigurinë ekonomike dhe sociale të punëtorëve të RTK-së. Ky veprim përbën shkelje të të drejtave themelore të punëtorëve për pagë të rregullt dhe kushte të denja pune”, kanë thënë ato.
Sipas sindikatave në fjalë mos-ekzekutimi i buxhetit rrezikon pavarësinë editoriale dhe misionin publik të RTK-së si transmetues i pavarur dhe shërbyes i interesit qytetar. Ato e cilësojnë të papranueshme që një institucion me rol kushtetues në informimin e drejtë të qytetarëve të lihet në pasiguri financiare për shkak të, siç thuhet, “neglizhencës institucionale”.
