Veseli ka vlerësuar lart punën dhe angazhimin e grave në secilën pozitë që ato ushtrojnë
Kryetari i Kuvendit të Republikës së Kosovës, Kadri Veseli, ka pritur sot në takim Grupin Joformal të Grave në Institucionet e Sigurisë, të udhëhequr zëvendëskryetarja e Komisionit për Punë të Brendshme, Siguri dhe Mbikëqyrjen e FSK-së të Kuvendit të Republikës së Kosovës, Ganimete Musliu.
Kryetari Veseli dhe përfaqësueset e grave të këtij sektori, diskutuan për pozitën dhe rolin e gruas në institucioneve që prekin segmentin e sigurisë, sfidat dhe problemet me të cilat ato përballen.
Kryeparlamentari Veseli vlerësoi lart punën dhe angazhimin e grave në secilën pozitë që ato ushtrojnë, duke konfirmuar përkushtimin e tij për të mbështetur avancimin e rolit të tyre në secilin segment institucional dhe shoqëror të vendit.
Me theks të veçantë, Veseli çmoi përkushtimin e grave që punojnë në sektorin e sigurisë, të cilat, sipas tij, japin mesazhin e fuqishëm se gruaja është e denjë dhe mund të përballojë sfidat në çdo sferë të jetës shoqërore dhe institucionale.
Duke e falënderuar kryeparlamentarin Veseli për përkushtimin e tij të theksuar në avancimin e pozitës dhe rolit të gruas shoqëri dhe në vendimmarrje në veçanti, drejtuesja e Grupit, njëherësh deputete e Kuvendit të Kosovës, Ganimete Musliu, e njohu atë me angazhimet e këtij grupi në evokimin e të drejtave dhe forcimit të pozitës së grave që punojnë në sektorin e sigurisë në Kosovë./21Media
